A OPP83–Cooperativa Galega do Mar Santa Uxía de Ribeira desenvolveu unha xornada de actividades educativas no CEIP Heroínas de Sálvora dirixida a alumnado de 4º, 5º e 6º de Primaria, co obxectivo de fomentar o consumo de peixe e achegar o mundo da pesca ás novas xeracións.
Durante a actividade, arredor de 50 escolares participaron nun obradoiro de cociña no que aprenderon a preparar Lirio de Ribeira, elaborando os seus propios rollitos de peixe e descubrindo a calidade, versatilidade e valor nutricional deste produto fresco de proximidade. Ademais, asistiron a unha charla divulgativa na que coñeceron os tipos de barcos da OPP83, as principais especies que se capturan e as claves para identificar e mercar peixe fresco a través da correcta interpretación do etiquetado.
Estas accións enmárcanse no Plan de Produción e Comercialización da OPP83, cofinanciado pola Xunta de Galicia e polo Fondo Europeo Marítimo, de Pesca e Acuicultura (FEMPA), e forman parte do noso compromiso coa difusión da cultura mariñeira, a posta en valor do sector pesqueiro e a promoción dunha alimentación saudable baseada no consumo de peixe.
