A OPP83 – Sociedade Cooperativa Galega do Mar Santa Eugenia celebrou o pasado 11 de setembro a V Xornada de Pesca de Ribeira, un encontro que reuniu na Escola Oficial Náutico-Pesqueira de Ribeira representantes do sector, das distintas administracións e persoas expertas do ámbito marítimo-pesqueiro.
Baixo o título «Claves para abordar a pesca no próximo fondo marítimo-pesqueiro», esta quinta edición puxo o foco nalgúns dos principais desafíos que marcarán o futuro inmediato da actividade pesqueira: o escenario posterior ao actual FEMPA, o financiamento europeo, a modernización e descarbonización da frota, o relevo xeracional, a seguridade a bordo e a mellora das condicións sociais e laborais das tripulacións.
Unha das mensaxes centrais trasladadas pola OPP83 foi a necesidade de que o próximo marco financeiro europeo manteña un fondo específico para a pesca, claramente identificado e cunha dotación suficiente, capaz de responder á diversidade e ás necesidades reais da frota.
Unha xornada para abordar o futuro da actividade pesqueira
A apertura contou coa participación da xerente da OPP83, María José Casais; do director da Escola Oficial Náutico-Pesqueira de Ribeira, Juan Domingo Cambeiro; e da alcaldesa de Ribeira, María José Sampedro.
Juan Domingo Cambeiro destacou a importancia deste tipo de encontros para analizar os retos aos que se enfronta o sector e traballar pensando no futuro da actividade e de quen se está formando para incorporarse a ela. Pola súa banda, a alcaldesa de Ribeira incidiu na necesidade de situar as persoas no centro das políticas vinculadas ao mar e conseguir que as novas xeracións perciban a pesca como unha actividade con futuro, emprego digno e posibilidades de desenvolvemento profesional.
Un posFEMPA con maior ambición financeira e menos burocracia
Un dos bloques centrais da xornada foi a mesa redonda «O sector pesqueiro posFEMPA», na que participaron o subdirector xeral de Sostibilidade Económica e Asuntos Sociais do Ministerio de Agricultura, Pesca e Alimentación, Manuel Pablos, e o director xeral de Pesca, Acuicultura e Innovación Tecnolóxica da Xunta de Galicia, Isaac Rosón.
Manuel Pablos defendeu que o sector non debería perder financiamento respecto do actual FEMPA e reclamou para o futuro marco unha regulación máis sinxela e unha maior ambición financeira que permitan abordar cuestións fundamentais como o relevo xeracional.
Isaac Rosón defendeu, pola súa banda, a necesidade de manter un fondo europeo específico para a pesca, unha reivindicación de especial importancia para territorios nos que o sector ten un peso económico e social tan relevante como Galicia. Unha vez garantidos os recursos, sinalou, será necesario abordar tamén a súa distribución e as prioridades ás que deberán destinarse.
A modernización dunha frota que necesita afrontar novos retos
A renovación da frota ocupou tamén unha parte importante do debate. Durante a súa intervención, Manuel Pablos advertiu de que o envellecemento dos buques limita a capacidade do sector para avanzar en cuestións como a transición enerxética, a descarbonización ou o relevo xeracional.
Neste sentido, púxose de manifesto a necesidade de dispoñer dunha regulación adecuada, financiamento suficiente, portos preparados e solucións técnicas que fagan posible modernizar os buques e manter unha frota competitiva.
Potencia de motores, regulación e eficiencia enerxética
A directora xeral da Mariña Mercante, Ana Núñez, centrou a súa intervención no proceso de regularización da potencia dos motores e na necesidade de axilizar e simplificar os procedementos administrativos asociados á potencia e ás emisións dos buques.
A última ponencia técnica correu a cargo de Ricardo Iparraguirre, director de Bureau Veritas Norte de España, e Adrián Sarasquete, director xeral de VICUSdt.
Ricardo Iparraguirre explicou o procedemento de certificación da potencia dos motores e o papel de Bureau Veritas como organización autorizada para realizar recoñecementos e certificacións en nome da Dirección Xeral da Mariña Mercante.
Pola súa banda, Adrián Sarasquete presentou Open Water, unha ferramenta de enxeñaría propulsiva de VICUSdt orientada a reducir perdas e mellorar a eficiencia enerxética sen incrementar a capacidade pesqueira. Entre outras aplicacións, explicou a súa utilización na frota de arrastre para manter as condicións de traballo reducindo a potencia necesaria e sen aumentar o esforzo pesqueiro.
«O sector está disposto a avanzar, pero ese camiño ten que ser viable»
Na clausura da xornada, a xerente da OPP83, María José Casais, incidiu en que financiamento, modernización, descarbonización e regulación forman parte dun mesmo desafío e defendeu que os cambios que debe afrontar o sector teñen que ser técnica e economicamente viables e responder á realidade e diversidade da frota.
A conselleira do Mar, Marta Villaverde, pechou a V Xornada de Pesca de Ribeira apelando ao traballo conxunto entre o sector e as Administracións nun momento decisivo para o futuro da pesca. Reivindicou un fondo específico, suficiente e accesible que permita renovar a frota, reducir as cargas burocráticas e compatibilizar a protección ambiental coa protección económica e social das familias que viven do mar.
Desde a OPP83 queremos agradecer a participación de todos os relatores, representantes institucionais, profesionais e asistentes que fixeron posible esta quinta edición, así como a colaboración da Escola Oficial Náutico-Pesqueira de Ribeira e de todo o seu equipo humano pola súa acollida e polas facilidades prestadas para a celebración do encontro. Así mesmo, gustaríanos destacar que a V Xornada de Pesca de Ribeira foi posible grazas á súa disposición e colaboración e, tamén, grazas ao financiamento da Xunta de Galicia e do FEMPA, a través do noso Plan de Produción e Comercialización de 2026.
Presentacións da V Xornada de Pesca de Ribeira
Como complemento aos contidos abordados durante a xornada, poñemos á disposición das persoas interesadas as presentacións utilizadas na intervención técnica de Bureau Veritas e VICUSdt.
Condicións de uso das presentacións: A OPP83 conta coa autorización expresa dos seus autores para a publicación e consulta destas presentacións exclusivamente a través da páxina web da OPP83. Esta autorización non comprende a súa reprodución, distribución, difusión ou utilización, total ou parcial, fóra deste sitio web. Calquera uso distinto deberá contar previamente coa autorización expresa dos seus respectivos autores. Os contidos, imaxes, gráficos e demais materiais incluídos nas presentacións pertencen aos seus respectivos autores e permanecen suxeitos aos dereitos de propiedade que lles correspondan.
La V Xornada de Pesca de Ribeira en los medios
La jornada tuvo repercusión en distintos medios de comunicación. A continuación compartimos algunos titulares y enlaces:
- La Voz de Galicia: Frente común en Ribeira para exigir a Europa un fondo pesquero propio y la renovación de la flota
- Diario de Arousa: Ribeira exige a Europa fondos para modernizar la flota pesquera en Galicia
- Europa Press: La Xunta apela a la unidad entre el sector pesquero y las administraciones para reforzar la posición de Galicia
- O Barbanza: Sector, Xunta e MAPA reclaman dende Ribeira un fondo propio para a pesca e marxe real para modernizar a frota
- Moncloa.com: El sector pesquero gallego exige en Ribeira un fondo pesquero europeo propio para modernizar la flota
- Industrias Pesqueras: La OPP83 reclama desde Ribeira financiación y apoyo comunitario para afrontar la modernización del sector
- Canal Barbanza: Xornadas Pesca Ribeira
- Europa Azul: Sector, Xunta y MAPA reclaman a Europa un fondo propio para la mesca y margen real para renovar la flota
- Canal Rías Baixas: O futuro da pesca a debate en Ribeira
