Os barcos da Cooperativa Santa Uxía de Ribeira, integrados na Organización de Produtores Pesqueiros OPP83, retiraron do medio mariño un total de 11 toneladas de residuos desde que se puxo en marcha a súa colaboración coa ONG Vertidos Cero hai 7 anos.
Esta iniciativa, que se desenvolve de forma continuada, permite que os barcos asociados desembarquen no peirao os residuos —principalmente plásticos— que atopan durante a súa actividade pesqueira, xa sexa enganchados nas redes ou flotando na auga. Posteriormente, Vertidos Cero encárgase de identificar, clasificar e reciclar estes materiais, contribuíndo á economía circular e á redución da contaminación mariña.
Con este tipo de accións, a OPP83 reafirma o seu compromiso coa sustentabilidade e a protección do medio mariño, un compromiso que vai máis aló da recollida de lixo. Entre outras medidas, a organización impulsa a redución do esforzo pesqueiro, a diminución da actividade en determinados períodos e o uso de artes de pesca artesanais e selectivas, respectuosas cos ecosistemas.
A recollida de residuos mariños forma parte das actuacións incluídas no Plan de Produción e Comercialización da OPP83, cofinanciado pola Xunta de Galicia e o FEMPA, e reflicte o papel activo do sector pesqueiro na conservación dos océanos.
