- Arredor de 1.000 racións de Lirio de Ribeira en tempura foron distribuídas de balde entre os asistentes á segunda xornada do XVII Encontro de Embarcacións Tradicionais de Galicia, organizada por Culturmar en colaboración coa Cofradía da Dorna e do Concello de Ribeira, entre outras entidades.
En torno a dúas horas duraron as arredor de 1.000 racións de Lirio de Ribeira servidas durante a segunda xornada do XVII Encontro de Embarcacións Tradicionais de Galicia, que se celebrou entre o 17 e 20 de xullo en Ribeira. A OPP83 ofreceu unha degustación gratuita de Lirio de Ribeira en tempura que gozou de gran aceptación por parte dos presentes, tal e como demostran as cúas que se rexistraron durante o evento.
A acción contou coa participación de integrantes da OPP83 como o seu presidente José Antonio Pérez, a súa xerente María José Casais e o membro do Consello Rector Pablo Pérez. Apoiando a iniciativa tamén estiveron o concelleiro de Mar de Ribeira, Fernando Abraldes, o alcalde de Ribeira, Luis Pérez, e a xefa de distrito da Capitanía Marítima de Ribeira, Leire Blanco.
Esta actividade promocional que fixo as delicias dos participantes no encontro foi posible grazas á cofinanciación da Xunta de Galicia e o FEMPA. Con este evento, integrado no PPeC 2025 da OPP83, preténdese incentivar o consumo de peixe entre a poboación e, ao mesmo tempo, promocionar a marca colectiva Lirio de Ribeira, rexistrada a finais de 2022 e que cumpre unha serie de parámetros de calidade e frescura que o convirten nun produto pesqueiro de nivel EXTRAordinario.
