Case un ano despois da entrada en vigor da obrigación de desembarque, o pasado 1 de xaneiro, a aplicación da normativa continúa como un motivo de preocupación para o sector. A Cooperativa do Mar Santa Eugenia organizou onte unha xornada na que representantes do sector, as administracións pesqueiras e os científicos coincidiron na necesidade de colaborar para conseguir que o cumprimento desta norma non afecte á rendibilidade da actividade pesqueira.
«Aínda que o obxectivo é moi loable, a lexislación non se adapta ao sector e pode constituír unha ameaza para o seu futuro», advertiu Mercedes Rodríguez, directora xeral de Pesca da Xunta. Na súa opinión non é fácil cumprir a obrigación de desembarque «pola ineficacia do actual sistema de TACs da Unión Europea que se basea en desembarques e non en capturas. En gran sol a captura dun quilo de bacallau cando non se ten cota, pode supoñer o peche definitivo da pesqueira».
A representante da administración galega lembrou que «en Galicia en pesca fresca temos 270 especies comercializadas; iso quere dicir que a un pescador galego repélelle, unha vez capturado o peixe, ter que tiralo ao mar». «É un orgullo atopar saída comercial a todo o que capturamos», subliñou. «Pero iso non quere dicir que non necesitemos máis cotas ou sacar do sistema de TACs e cotas algunhas especies. Debemos traballar xuntos para afrontar esta obrigación de desembarco», engadiu.
Rafael Centenera, subdirector xeral de Caladoiro Nacional e de Augas comunitarias do MAPA, destacou que a administración española ha conseguido flexibilidades na aplicación da normativa, e que traballa para avanzar nesta liña. Centenera insistiu na necesidade de que o sector e a administración vaian da man para lograr mellores resultados en Bruxelas.
O científico galego e investigador do Instituto Español Oceanográfico (IEO) Julio Valeiras sinalou que «a colaboración do sector é fundamental para elaborar os informes técnicos que xustifiquen as exencións á obrigación de desembarque». Na súa charla titulada Redución de descartes pesqueiros: A obrigación de desembarque e o asesoramento científico de IEO, Valeiras explicou aos armadores presentes na xornada os estudos realizados en coordinación coa secretaría xeral de Pesca sobre mellora da selectividade das artes e a alta supervivencia de determinadas especies, unha vez capturadas, que unha vez validados por Bruxelas resultan en melloras para o sector.
